Супермаркетите им помагаат на купувачите

Вртоглаво високата инфлација во Европа го промени однесувањето на потрошувачите при купување. За многумина цената стана главен приоритет и трговците реагираат на оваа штедливост.

Францускиот гигант „Карфур“ објави замрзнување на цените на 100 производи од сопствената трговска марка, од кои најголемиот број се секојдневно неопходни артикли. „Замрзнатиот“ асортиман вклучува житарки, кафе, конзервиран зеленчук, детергенти и пелени. „Е. Леклер“ во август објави дека ги ограничи цените на повеќе од 230 основни производи до почетокот на декември, продолжувајќи го замрзнувањето на цените што го воведе во мај за 120 производи. И двата трговски синџира замрзнувањето на цените го поврзаа со нивните картички за лојалност.

Во Данска, „Кооп“ воведе нова програма наречена „Goi pris – hver dag“ (добра цена – секој ден) на 400 популарни намирници, а конкурентот „Селинг груп“ ја ограничи цената на 300 артикли. Полскиот лидер во малопродажбата „Биедронка“ се обврза на замрзнување на цените на 150 од најчесто продаваните производи.

Освен тоа, трговците повторно го реосмислуваат асортиманот со приватни трговски марки. „Алберт Хеин“ најави дека има намера да го зголеми уделот на производите од трговската марка, кој сега изнесува околу педесет проценти. „Асда“ воведе економичен асортиман, наречен „Just Essentials“, кој опфаќа околу 300 производи. „Сеинсберис“ ја засилува кампањата „Price Lock“, која ги опфаќа цените на речиси 2.000 предмети за домаќинството од сопствениот бренд. „Реве“ го прошири својот популарен економски бренд ja! на повеќе од 1.100 производи.

Генерално, истражувањата покажуваат дека купувачите се свртуваат кон приватните трговски марки како алтернатива за поскапите А-брендови. Без разлика дали ги купуваат во дисконтите или во супермаркетите, се чини дека глобалната криза им оди во прилог на трговските брендови.