„Деливеро“ воведе 10 - минутна услуга за достава

Британската компанија за испорака „Деливеро“ во Италија воведе нова 10-минутна услуга за достава, под називот Hop.

За оваа услуга, „Деливеро“ се здружи со „Карфур“. Понудата се состои од повеќе од 1.500 производи, во кои се вклучени и приватните марки на трговецот.

Услугата функционира преку т.н. „продавници во сенка“ (dark stores) и за почеток ќе биде достапна во Милано. Во следните месеци се очекува да се прошири во Рим и во други италијански градови. Потрошувачите ќе имаат можност да ја проверат достапноста на производите во реално време, така што ќе нема потреба за замени.

И трговскиот синџир „Шпар“ почна со брза испорака за 35 минути во 14 италијански градови. Компанијата ја нуди услугата во партнерство со платформата за достава „Глово“ и е достапна 7 дена во неделата.

Во последните 12 месеци уште неколку специјализирани оператори почнаа да нудат услуги за брза достава во Италија, вклучувајќи ги „Горилас“ и „Гетир“.