Контроли во над 30 откупни центри: Комисијата откри индиции за можни прекршувања при откупот

Комисијата за одлучување по прекршок при Комисијата за заштита на конкуренцијата спровела контроли во повеќе од 30 откупни центри во Гевгелија, Струмица, Кривогаштани и Ресен, при што биле опфатени и откупот на пиперки и јаболка.

Контролите биле спроведени преку непосредни увиди и прибирање податоци и документација од откупните центри. Целта била да се утврди на кој начин се формираат откупните цени, под кои услови се врши откупот и како откупните центри ги утврдуваат и менуваат цените.

Од Комисијата соопштија дека при досегашната анализа на прибраните податоци и документација биле утврдени одредени индиции кои упатуваат на можни прекршувања на прописите што се во нејзина надлежност.

Во следниот период ќе продолжи деталната анализа и проверката на документацијата, по што, зависно од утврдените факти и во согласност со законските овластувања, ќе бидат преземени соодветни мерки.

Од Комисијата за заштита на конкуренцијата нагласуваат дека ќе продолжат со контроли и постапување во случаи во кои постојат индиции за нарушување на правилата на конкуренцијата.

Како што наведуваат, целта е да се обезбедат еднакви услови за пазарно натпреварување и да се заштитат интересите на сите учесници на пазарот.