Синџирот супермаркети „Диа“ оствари бруто-продажба од 2,9 милијарди евра во првата половина од финансиската 2026 година, што претставува годишен раст од 11,6%, пишува ESM Magazine.
Според податоците на „Нилсен Ај-Кју“ (NielsenIQ), „Диа“ во Шпанија расте повеќе од двојно побрзо од вкупниот пазар, освојувајќи дополнителни 26 базични поени пазарен удел и потврдувајќи ја својата позиција како четврти најголем национален трговец во земјата.
Прилагодената EBITDA пораснала за 17%, на 160 милиони евра, со зголемување на маржата за 31 базичен поен, на 6,5%, додека нето-добивката се зголемила за 6,4%, на 51 милион евра.
Кога ќе се исклучи влијанието на еднократното даночно олеснување од претходната година, основната нето-добивка бележи раст од 30%.
Силниот оперативен паричен тек од 172 милиони евра ѝ овозможил на компанијата да го намали нето-финансискиот долг за 18%, на 206 милиони евра, со што финансиската задолженост се намалила на 0,6 пати EBITDA.
Во текот на првата половина од годината, „Диа“ остварила нето-зголемување на мрежата за 48 продавници, отворајќи 58 нови и затворајќи десет продавници. Со тоа компанијата е на добар пат да ја оствари целта за нето-зголемување од 100 продавници во текот на годината.
Програмата за лојалност Club Dia генерирала 57% од вкупната продажба, што претставува годишно зголемување од 12,7%. Продажбата на свежи производи и производи од приватната трговска марка пораснала за по 14%.
Во Аргентина, „Диа“ забележала пад на вкупниот обем на продажба од 4,6%, додека бруто-продажбата се намалила за 12,4%, на 722 милиони евра, главно поради зајакнувањето на еврото за 37,4% во однос на аргентинскиот пезос.
Сепак, строгата контрола на трошоците и мерките за зголемување на ефикасноста придонеле за подобрување на прилагодената EBITDA маржа за 30 базични поени. Трговецот го завршил периодот со нето-парична позиција од 40 милиони евра, истовремено зголемувајќи го пазарниот удел за десет базични поени.
„Продолжуваме да остваруваме профитабилен раст, да го забрзуваме нашето органско проширување, да ја зајакнуваме оперативната извонредност и да одржуваме цврста финансиска дисциплина. Накратко, градиме компанија која секој ден станува сè посилна и долгорочно создава одржлива вредност“, изјави Мартин Толкачир, извршен директор на компанијата.
