Србија: dm со нов ценовен концепт

Синџирот дрогерии „дм дрогерие маркт“ направи нов потфат со воведување на долгорочни поволни цени, кои целосно ќе ја заменат досегашната политика на акциски цени.

Новиот концепт „Секогаш поволно“ стапи на сила на почетокот на годинава, за купувачите да можат да заштедат пари и време на подолг рок.

Како што соопштуваат од dm со воведување на ваков концепт на купување, синџирот настојува на домашниот пазар да ги пренесе одржливите трендови и квалитетната практика на другите европски земји каде што работи dm.

Водени од искуството на европските земји во кои работиме и внимателно слушајќи го домашниот пазар, решивме да влеземе во 2022 година со нов потфат кој ќе ги подобри потрошувачките навики на нашето општество. Концептот „Секогаш поволни“ ќе им овозможи на купувачите да купуваат без стрес, без споредување цени, чекање ред и следење залихи или да складираат производи што можеби нема да им требаат во тоа време. Горди сме што имаме можност да им понудиме на нашите сограѓани уште подобра атмосфера, изјави Весна Стојановиќ, директорка на „дм дрогерие маркт“ за Србија и Северна Македонија.

Отсега, наместо производи на двонеделни и месечни промоции, dm на своите купувачи им нуди голем број производи кои се карактеризираат со долгорочни поволни цени. Бројот на производи ќе продолжи да се зголемува, а нивните цени гарантирано ќе останат исти најмалку четири месеци. Дополнително, важен параметар е тоа што долгорочната поволна цена е значително пониска од редовните цени на пазарот, посочуваат од dm.