Регионални самити

FMCG-самит Белград: Нови партнерства, искуства и знаења

19 дек 2014
Речиси 400 учесници од 141 компанија од Словенија, Хрватска, БиХ, Македонија, Црна Гора и Србија беа дел од регионалната конференција за трговскиот сектор „FMCG-самит Белград", во организација на магазинот InStore, што се одржа на 25 ноември во хотелот „Краун плаза".
 
 
На дневен ред на конференцијата беа дискусиите за актуелните прашања и проблеми што ги засегаат трговците, дистрибутерите и производителите од целиот регион: преговори, улистување и промоции. Говорниците ги обработија старите теми од нов агол и понудија конкретни одговори и предлог-решенија.
 
Учесниците имаа можност и да ги проследат резултатите и истражувањата на агенцијата ГфК за предрасудите што владеат за современиот купувач, а агенцијата „Нилсен" за потребите на конференцијата го анализираше продажниот удел во категориите на домашните производи во Србија, регионот и светот.

Модератор на „тркалезната маса" беше Милан Ќулибрк (главен и одговорен уредник на магазинот НИН), а учесниците Роберто Манкузо (генерален директор на „Метро кеш & кери" – Србија), Матјаж Водопивец (директор на стратешкото работно подрачје Слатко и солено во „Атлантик груп") и Мирослав Милетиќ (генерален директор на „Бамби") разговараа за можностите за глобално пласирање на локалните производи.
Во продолжение се реакциите и коментарите на дел од учесниците:

 
Среќко Дебелак (директор, „А.Т.Карни"): Добрата посета сведочи дека сите учесници во секторот очигледно сакаат да дознаат нешто повеќе. Најголемите вредности на средбата се споделувањето знаење, новите познанства, како и новите деловни врски.
Јованка Трајкова (маркетинг-специјалист, маркети „Рептил"): Уживавме во предавањата и презентациите! Размената на знаења и информации е секогаш  корисна за секого. Говорниците беа одлични, а ако некого морам да издвојам, тоа би биле Александар Марковиќ од „Металац" и Даворка Биондиќ Винце. Позитивните ефекти и новите сознанија кај нас предизвикаа поголем интерес и сигурна сум дека дел од нив ќе имплементираме во нашето работење.
Филип Илиев (бренд-менаџер, „Ино спектар"): Организацијата на самитот беше на високо ниво и задоволни сме во секој поглед. Говорниците од различни компании кажаа многу интересни работи што сите нè засегаат. Сепак, би ги издвоил Александар Марковиќ, Даворка Биондиќ, Коста Греци и истражувачката агенција „Нилсен". Имаше бројни податоци за состојбата на српскиот пазар и регионот, единствено мислам дека повеќе треба да биде вклучен и македонскиот пазар, иако е мал.
Далибор Ѓошевски (генерален директор, маркети „Жито"): Освен зацврстување на постојните и воспоставување на новите контакти, размената на искуства и знаења е од непроценлива вредност. Од големо значење е да се слушнат мислењето и ставовите на еминентни луѓе од секторот, а советите се секогаш добредојдени.
Оливера Ќирковиќ (менаџер за корпоративни комуникации, „Универекспорт"): Конференцијата целосно ги исполни трите сегменти што им се потребни на припадниците на FMCG-секторот: анализа на минатото, преглед на сегашноста и предлози за иднината. Партнерски однос беше најчесто споменуваниот израз, а InStore го направи вистинскиот и првиот чекор во таа насока – да нè собере во толкав број на едно место.
Александар Синѓелиќ (директор на секторот за услуги за панели за потрошувачи, ГфК Србија): Конференцијата е одлична можност да се слушнат некои нови работи, но и да се потврдат познатите на поинаков начин.
Даворка Биондиќ Винце (консултантска фирма „Бионди"): Мојата сугестија до организаторот е да не се преклопуваат темите и говорниците да се држат до договореното време (најпрвин критиката е насочена кон мене). Инаку, честитки за „крвавата работа". Научив некои нови работи и ви благодарам поради тоа.
Андреа Радоњиќ (директор за корпоративни односи, „Метро кеш & кери"): Секоја чест за организацијата! Панел-дискусиите беа многу интересни, а презентерите зборуваа таргетирано и отворија нови теми. Имавме можност да ѕирнеме и зад сцената, како и да запознаеме нови луѓе и можности за соработка.
Хана Рукавина (маркетинг-менаџер за јадранскиот регион, SCA): Собирите од овој тип се одлична можност за размена на искуства, излегување од деловното секојдневје и надградување во комплементарните области. Особена пофалба за изборот на темите, релевантни за нашата индустрија. Презентацијата што ја издвојувам е онаа на Среќко Дебелак, корисна и за трговците и за нас производителите.
Мислав Смолчиќ (регионален маркетинг-менаџер, „Хенкел"): Овие собири се секогаш добредојдени и вредни за пофалба. Добро е да се слушнат нови содржини, информации, да се разменат искуства и критички да се вкрстат размислувањата. На тој начин и пазарот ќе напредува.

 

 

 


 



@InStore.mk
Крадењето авторски текстови е казниво со закон. Преземањето авторски содржини (текстови и фотографии) од оваа страница е дозволено само делумно и со ставање хиперлинк до содржината што се цитира. 





Петтиот FMCG Самит во Белград собра над 480 учесници

19 дек 2014

Успешно одржан FMCG Summit во Сараево

19 дек 2014

Одржан најбројниот FMCG самит досега во Србија!

19 дек 2014

Првиот FMCG-самит во Хрватска ги надмина очекувањата

19 дек 2014

Успешно одржан првиот FMCG-самит во Љубљана

19 дек 2014
Вчитува уште новости...