Свесни одлуки за паметен избор

Главните фактори што влијаат врз одлуките за купување се квалитетот, функционалноста, практичноста и цената. Во потрошувачката се имплементирани и навиките за ублажување на финансискиот притисок, а сѐ попопуларни стануваат и производите поткрепени со научни и целни решенија.

Извор: „Еуромонитор интернационал“, www.euromonitor.com

Компанијата за анализа на податоци „Еуромонитор интернационал“ го објави извештајот за петте клучни глобални потрошувачки трендови за 2025 година, кои ги објаснуваат промените во однесувањето на потрошувачите. Главните фактори што влијаат врз одлуките за купување во сите пет тренда се квалитетот, функционалноста, практичноста и цената. Во потрошувачката се имплементирани и навиките за ублажување на финансискиот притисок, а сѐ попопуларни стануваат и производите поткрепени со научни и целни решенија.

Извештајот на „Еуромонитор“ илустрира како различните генерации влијаат врз деловната динамика, создавајќи нови можности и како компаниите се приспособуваат на променливите навики на купувачите. Во реалност дефинирана од трошоците за живот, зелените атрибути и очекувањата за благосостојба, овие трендови се суштината за однесувањето на потрошувачите низ целиот свет.

Главни потрошувачки трендови за 2025 година:

1. Здравствени планови;
2. Паметни паричници;
3. Екологика;
4. Филтриран фокус;
5. ВИ-амбивалентност.

ЗДРАВСТВЕНИ ПЛАНОВИ

Потрошувачите сакаат да живеат поздраво и се стремат кон долговечност. Тие го менуваат однесувањето за да ја подобрат сопствената иднина. Целта им е да живеат поздраво и подолго. Луѓето бараат превентивни решенија и производи што таргетираат специфични проблеми. Брендовите можат да ја задоволат оваа побарувачка со иновации што поддржуваат оптимално здравје во секој период од животот.

Виталноста во тренд

Новиот поглед кон староста станува сѐ попопуларен. Луѓето не сакаат само да живеат подолго (животен век), туку подобро да се чувствуваат подолго време (здравствен век). Поголемиот дел од потрошувачите веруваат дека во следните неколку години ќе бидат поздрави отколку што се сега (52%). Нивната желба за долговечност го обликува сегашниот здравствен избор. Тоа води кон поголем фокус на превентивни и специјализирани решенија. Двигатели на овој тренд се сè постарото население, долготрајните ефекти од пандемијата, низата образовни ресурси и технолошкиот напредок.

Богатството на благосостојбата

Можностите за пораст постојат и надвор од традиционалните здравствени категории. Технолошките компании и брендовите треба да го свртат вниманието кон овој тренд и да ги истражат персонализираните решенија базирани на податоци, преку сопствени ресурси или стратешки партнерства. Поврзаните уреди и апликации нудат увид во реално време, што им помага на потрошувачите да го насочат своето однесување. Се очекува глобалната продажба на паметни уреди да забележи двоцифрен пораст во периодот од 2024 до 2026 година.

Компаниите треба да создадат практични и целни решенија за одредени сегменти од нивната публика. Производите и услугите мора да одговорат на нивните потреби – од физички промени и ментално здравје, до нутритивната поддршка.

Три тактики за 2025 година:

• Развој на целни производи за самогрижа и приспособени решенија за специфични проблеми или незадоволени потреби за различни фази од животот.
• Користење научно поткрепени докази или резултати во маркетинг-материјалите за да се нагласи како формулациите, уредите или дизајните ја поддржуваат долговечноста.
• Партнерство со технолошки или дијагностички компании за создавање персонализирани здравствени решенија и следење во реално време.

ПАМЕТНИ ПАРИЧНИЦИ

Потрошувачите планираат да штедат повеќе и одлуките за купување ги прават стратешки и со цел. Додадената вредност е очекувана. Луѓето ја проценуваат вредноста на купеното според нивните приоритети – и во однос на тековните потреби и идните барања. Стратешкото купување станува инхерентен начин на размислување. Компаниите треба да одговорат со решенија што пренесуваат јасни придобивки и остварливи стимулации.

Стимулирачко купување

Долготрајната економска несигурност создаде нови норми за потрошувачка, дури и во услови кога глобалната инфлација се очекува да падне на 4,2% во 2025 година. Освен тоа, инфлацијата во економиите во развој се предвидува да се задржи на стабилно ниво од 5,5%. Речиси половина од потрошувачите планираат да заштедат повеќе пари, а 72% се загрижени за зголемените цени на секојдневните артикли. Сепак, 50% биле подготвени да потрошат пари за да заштедат време.

Ненадејните скокови на трошоците за живот не се единствената причина поради која луѓето бараат начини да заштедат. Притоа, тие не ги бараат само најдобрите зделки за моменталните потреби, како што претходната година беше случај со трендот „хакери на вредноста“. Потезите за намалување на финансискиот притисок станаа иманентни навики на потрошувачите. Одлуките за купување се стратешки и целни. Поголемиот дел од потрошувачите интензивно ги истражувале производите или услугите, а само 18% изјавиле дека често купувале импулсивно во 2024 година.

Проверена вредност

Брендовите што имаат веродостојна додадена вредност можат да профитираат од овој тренд. Квалитетот, функционалноста, практичноста и цената се фактори што влијаат врз одлуката за купување. Приватните трговски марки во неколку FMCG-категории имаа многу поголеми приходи во продажбата во споредба со другите производи.

Речиси половина од потрошувачите сакале да соработуваат со брендовите и да влијаат врз иновациите во 2024 година. Доколку брендовите ги вклучат потрошувачите во процесите на развој и тестирање на производите, тие директно ќе ги задоволат нивните потреби, а истовремено ќе ја негуваат и лојалноста. Особено важно е и корисничкото искуство, особено омниканалното присуство на брендовите. Уникатните кампањи и образовните ресурси што ја надополнуваат основната понуда можат да поттикнат силен ангажман.

Програмите за лојалност се уште една огромна можност за брендовите, но тие треба да бидат робусни. Наместо вообичаените поени и попусти, брендовите треба да понудат специјални настани и ексклузивни прегледи за новите производи. Стратешките партнерства додаваат вредност и за членовите што добиваат стимулации од други брендови.

Три тактики за 2025 година:

• Развој на кампањи за различни сегменти на потрошувачи, преку кои ќе се пренесат релевантните и специфични придобивки.
• Поврзување на приоритетите на целната публика со вредноста на брендот, за да се покаже веродостојната додадена вредност на производите или услугите.
• Поттик на лојалноста со краткорочни и долгорочни стимулации, кои ја надополнуваат понудата и се корисни за купувачите.

ЕКОЛОГИКА

Луѓето продолжуваат да носат одлуки што позитивно влијаат врз околината, но прифаќаат и прагматичен начин на размислување. Трошењето за одржливи алтернативи останува свесна одлука. Одржливите опции не само што се свесна одлука заснована на лични вредности, туку и на опипливи докази и предности што производите ги имаат во однос на потребите на купувачот. Брендовите не можат само да се китат со зелени ловорики. Тие мора да ги поврзат декларативните заложби со вистинските производи и со вистинската публика, за да ги уверат потрошувачите да изберат еколошки прифатлива опција.

Паметно зелени

Во последните години економичните опции ги надминаа зелените атрибути бидејќи долготрајната финансиска напнатост ги промени приоритетите на потрошувачите. Но, овие навики не треба да се сфатат како чекор подалеку од одржливоста. Повеќе од 60% од потрошувачите се обиделе да имаат позитивно влијание врз околината, а речиси две третини се загрижени за климатските промени. Свеста очигледно постои, но намерата за да се претвори во акција, префрлањето на остварлива опција мора да биде лесно. Довербата во зелените производи не се намали со текот на годините, но главна пречка за одлуките за купување останува достапноста. Околу 52% од потрошувачите сметале дека еколошките етикети се веродостојни, но, сепак, само 15% би платиле повеќе за овие производи.

Сега, потрошувачите имаат попрагматичен пристап кон одржливата потрошувачка. Зелените атрибути често се гледаат како суштински комплементарни придобивки, а не како единствен мотив. На пример, одговорното купување може да биде и здравствено и еколошки свесно. Купувачите можат да купат етички артикли врз основа и на други фактори, како што се издржливоста или форматот. Тие гравитираат кон остварлива опција, односно производ со слични придобивки по прифатлива цена. Целта на овој тренд е да се постигне трифекта (триумфално трио, комбинација од три фактори што водат до успешен резултат) – вистински декларации за вистински производи за вистинска публика.

Извор на слава

Одржливиот развој на производите не забавува. Бројот на онлајн-производи со декларации за одржливост постојано се зголемува, а поширокиот избор на одржливи алтернативи на потрошувачите им овозможува полесен пристап до тие производи, што го поттикнува купувањето.

Декларациите за одржливост помагаат да се зајакнат и другите карактеристики на производот.

Три тактики за 2025 година:

• Користење декларации за одржливост што ја нагласуваат вредноста на производот, како што се ефикасност, квалитет или безбедност.
• Фокус на развојот на производот и на неговите одржливи атрибути за пораст.
• Вклучување на одржливоста во производите или услугите што ѝ се познати на целната публика, со цел полесно да биде усвоена.

ФИЛТРИРАН ФОКУС

Потрошувачите се презаситени со информации и известувања, опкружени со безброј избори, па сакаат да потрошат помалку време за тоа што им е потребно. Брендовите се во трка за да го привлечат нивното внимание. Јасната комуникација и оптимизираните кориснички искуства треба да бидат стратешки приоритети за брендовите да можат да отскокнат и да се истакнат на пренатрупаниот пазар.

Преоптовареност со информации

Едно онлајн-пребарување носи илјадници податоци. Не е секогаш лесно да се најдат релевантни резултати и многубројните избори честопати ги прават луѓето несигурни за најдобриот избор. Дополнително, приливот на содржини генерирани од вештачката интелигенција ја зголемува конфузијата за вистинските наспроти лажните информации.

Сепак, потрошувачите не бараат да се намали бројот на опции, туку комуникацијата да биде поедноставна. Тоа може да биде во форма на појасно означување на пакувањето, оптимизирано купувачко искуство, приспособени препораки или супериорна услуга. Околу 42% од потрошувачите купувале преку „пренос во живо“ (livestreaming) затоа што карактеристиките на производот или услугата биле полесно разбирливи преку овој канал. Повеќе од една третина изјавиле дека полесната навигација на веб-страницата ќе го подобри нивното искуство за онлајн-купување. Сумирано во една реченица: потрошувачите сакаат да ги најдат најдобрите производи или услуги – брзо и лесно – кои навистина ги задоволуваат нивните потреби. Притоа, довербата игра клучна улога во процесот на донесување одлуки. Повеќето потрошувачи во 2024 година купувале само од компании на кои целосно им верувале. Луѓето, исто така, бараат и потврди, односно сертификати од трети страни за ја поткрепат декларацијата. Зголемената доверба може да ги претвори купувачите во лојални членови, кои ќе станат дел од екосистемот на брендот.

Рационализација и едноставност

Преполниот пазар создава жестока конкуренција и фрагментарен фокус. Полиците изобилуваат со производи што нудат речиси идентични придобивки. За да бидат влијателни, брендовите треба да се фокусираат на пораките и искуството на купувачите, односно стратешки да се насочат кон зајакнување на односите, зголемување на задоволството и поттикнување на лојалноста на брендот. Тоа може да се постигне преку приспособени и интуитивни решенија.

Три тактики за 2025 година:

• Користење јасни, искрени и поврзани пораки за да се пренесат уникатните придобивки од производите или услугите.
• Персонализација на интеракциите и испорака на релевантни информации за суштинско поврзување со купувачите.
• Оптимизација на корисничкото искуство за поедноставно откривање на производот.

ВИ-АМБИВАЛЕНТНОСТ

Генеративната вештачка интелигенција (ВИ) е ставена на пиедестал во последниве години. Очекувањата беа големи – можеби и превисоки. Но, како што се покажа и во реалноста, потрошувачите почнаа да бидат сведоци на ограничувањата на оваа технологија. Интеграциите и напредокот не забавуваат. Компаниите мора да бидат транспарентни и целни во употребата на генеративна вештачка интелигенција за да ја задржат довербата.

Несовршена интелигенција

Целата возбуда околу генеративната ВИ создаде постојан проток на нови апликации во последниве години. Повеќе од 40% од потрошувачите ја гледале ВИ како доверлив извор на информации во 2024 година, а речиси секој четврти потрошувач изјавил дека препораките за релевантни производи се главната придобивка од користењето на оваа технологија во процесот на купување. Зголемената употреба на вештачката интелигенција доведе и до скептицизам бидејќи потрошувачите и регулаторите изразија загриженост за недостатоците во резултатите.

Сепак, луѓето не ѝ вртат грб на оваа технологија. Наместо тоа, тие ги проценуваат нејзините предности и недостатоци. Почнуваат да ги разбираат нејзините ограничувања, но исто така го препознаваат и потенцијалот. ВИ може да генерира неточни одговори, да ги прекрши авторските права, да создаде плагијат на нечиј труд или да ги зајакне предрасудите.

„Халуцинациите“ на виртуелните соговорници, популарно наречени чет-ботови, придонесуваат за ширење дезинформации. И порастот на содржината генерирана од вештачка интелигенција на социјалните медиуми, без да биде означена како таква, може да ја наруши реалноста. Луѓето се загрижени и за тоа како оваа технологија може да влијае врз безбедноста на работата и економијата. Чувството на потрошувачите може да зависи од нивната перцепција на нивото на контрола или удобност во интеракциите овозможени од ВИ-технологијата.

Транспарентно и насочено

Генеративната вештачка интелигенција веќе се покажа како моќна алатка за компаниите. Речиси две третини од испитаниците изјавиле дека во следните неколку години нивната компанија планира да инвестира во оваа технологија. Сепак, тие треба да бидат внимателни и да не се потпираат целосно на ВИ. Чет-ботовите можат да одговараат на основните прашања на корисниците и да служат како прва точка на контакт, но човечките интеракции остануваат клучни – особено за сложени барања. Овие модели треба постојано да се тестираат и развиваат бидејќи неточните или бескорисни одговори ќе резултираат со фрустрација на крајниот корисник.

За компаниите е неопходно да ги идентификуваат случаите на правилна употреба пред да инвестираат во оваа технологија. Заштитата од измама во индустријата за финансиски услуги е одличен пример. Генеративната вештачка интелигенција може да ги анализира податоците од трансакциите и да забележи аномалии за побрзо откривање измами или да симулира обиди за измама за да им помогне на финансиските институции да ги подобрат безбедносните мерки.

За работната сила, ВИ може да се гледа како закана за создавање вишок наместо како алатка за подобрување на продуктивноста. Затоа, за компаниите е неопходно да постават јасни стандарди да ја користат оваа технологија за обука или поддршка на вработените. На крајот на краиштата, одржливиот деловен успех се потпира на човечката интелигенција.

Три тактики за 2025 година:

• Транспарентност во употребата на генеративна вештачка интелигенција во сите канали и содржини.
• Анализа на мислењето на потрошувачите за донесување одлуки за интеграции или апликации.
• Процена на точките на интеракција на ВИ-технологијата наспроти човечката експертиза и пронаоѓање на вистинската рамнотежа.

За компанијата:

„Еуромонитор интернационал“ е светски лидер за анализа на податоци и истражувања на пазарот, индустријата, економијата и потрошувачите, кој обезбедува глобален увид и податоци за илјадници производи и услуги. Компанијата е независен провајдер на глобална бизнис-интелигенција, анализа на пазарот и на потрошувачите. Од локални до глобални, од тактички до стратешки, истражувањата на „Еуромонитор“ ги насочуваат компаниите да направат стратешки одлуки за тоа како, каде и кога ќе го развиваат бизнисот. Компанијата има канцеларии низ целиот свет, тим од аналитичари во повеќе од 100 земји, како и најнови научни техники за податоци и истражувања на пазарот за секој клучен тренд.