„Валео Фудс Група“ соопшти дека постигнала договор за продажба на својот бизнис со прехранбени производи со долг рок на траење во Ирска на инвеститорска група предводена од Хилијард Ломбард, поранешен главен извршен директор на ирскиот огранок на компанијата.
Од компанијата соопштија дека оваа трансакција претставува позитивен следен чекор за „Валео Фудс Ирска“ и ја потврдува силата на бизнисот што бил граден во текот на многу години.
„Новите сопственици ги препознаваат квалитетот и искуството на вработените, силните односи со купувачите и трајната привлечност на портфолиото на водечки прехранбени брендови на компанијата и имаат јасна амбиција да го поддржат нејзиниот понатамошен развој и раст“, соопштија од компанијата.
Како што истакнуваат, за „Валео Фудс Група“ оваа трансакција е во согласност со стратегијата за оптимизација на портфолиото и дополнително фокусирање на амбицијата да стане „шампион во сегментот на слатки производи“.
Овој потег следува по значајните инвестиции во изминатите години во сегментите Naturally Sweet, кој опфаќа мед и јаворов сируп, кондиторски производи и слатки пекарски производи. Трансакцијата ќе ѝ овозможи на групацијата да продолжи да ги насочува ресурсите и инвестициите кон овие области на стратешки раст.
Завршувањето на трансакцијата зависи од вообичаените регулаторни одобренија во Ирска. Финансиските услови на трансакцијата нема да бидат објавени.
Од компанијата нагласуваат дека трансакцијата не претставува крај на односите меѓу двете страни. Компаниите планираат да продолжат со блиската деловна соработка и по нејзиното завршување, вклучително и со продолжување на дистрибуцијата на меѓународното портфолио на брендови на „Валео Фудс“ на ирскиот пазар.
