„Нестле“ го продава бизнисот со витамини, минерали и додатоци во исхраната

„Нестле“ постигна договор за продажба на својот основен бизнис во сегментот на витамини, минерали и додатоци во исхраната, познат како Holistic Health portfolio, на инвестициската компанија „Јелоу Вуд Партнерс“ за една милијарда американски долари, односно 0,8 милијарди швајцарски франци.

„Ова е уште еден важен чекор во стратешката трансформација на нашето портфолио. Ги насочуваме нашите ресурси кон областите во кои имаме најсилна конкурентска предност. Благодарение на силните капацитети за иновации и градење брендови, добро сме позиционирани за раст во премиум сегментот на витамини, минерали и додатоци во исхраната базирани на наука, каде што брендовите како Solgar и Pure Encapsulations продолжуваат да остваруваат силни резултати. Истовремено, категоријата се разви, а основниот VMS-бизнис бара поинаков пристап под сопственост на компанија која целосно ќе му се посвети“, изјави Филип Навратил, извршен директор на „Нестле“.

Трансакцијата опфаќа седум етаблирани брендови: Nature's Bounty, Osteo Bi-Flex, Ester-C, Gard, Nuun, Puritan's Pride и Sisu, заедно со поврзаниот бизнис со додатоци во исхраната под приватни трговски марки во САД, како и наменските производствени, пакувачки, складишни и дистрибутивни операции.

Во 2025 година овој бизнис остварил продажба од 1,2 милијарди долари, односно една милијарда швајцарски франци. Бизнисот е претежно присутен на американскиот пазар, со активности и во повеќе други земји, меѓу кои Канада и Кина.

Трансакцијата подлежи на вообичаените регулаторни одобренија и се очекува да биде завршена во текот на првата половина од 2027 година.