„Кјуриг Др Пепер“ го продава својот удел во „Чобани“

„Кјуриг Др Пепер“ соопшти дека ќе го продаде својот сопственички удел во компанијата „Чобани“ назад на овој производител на јогурт, заедно со производствен погон, во рамките на трансакција вредна 792 милиони евра, односно 925 милиони американски долари. Компанијата продолжува со преструктурирање на работењето по преземањето на „ЈДЕ Питс“, пренесува Reuters.

„Кјуриг Др Пепер“ ќе го продаде целиот свој сопственички удел во „Чобани“ за 685 милиони евра, односно 800 милиони американски долари, како и производствен погон и складиште во Алентаун, во американската сојузна држава Пенсилванија, за 107 милиони евра, односно 125 милиони американски долари.

Компанијата го преобликува своето портфолио по аквизицијата на холандскиот производител на кафе и чај „ЈДЕ Питс“ во април годинава, вредна 15,4 милијарди евра, односно 18 милијарди американски долари.

„Кјуриг Др Пепер“, исто така, се подготвува да ги издвои своите бизниси со кафе и безалкохолни пијалаци во две одделни компании, кои ќе бидат јавно котирани на американскиот пазар.

„Чобани“ соопшти дека во следните пет години планира да инвестира околу 1,03 милијарди евра, односно 1,2 милијарди американски долари, во овој производствен погон, како дел од плановите за производство на млеко со поголема содржина на протеини и помала содржина на шеќер во споредба со традиционалното млеко.