Европската Унија од четврток ќе го суспендира увозот на бразилско месо и други производи од животинско потекло поради загриженоста дека Бразил не ги исполнува правилата на ЕУ за употреба на антибиотици во сточарството. Одлуката опфаќа живинско и говедско месо, јајца и мед, а Брисел засега не наведе рок во кој трговијата би можела да биде обновена, пишува France24.
Европската комисија соопшти дека Бразил не доставил доволно уверувања дека неговите производи наменети за извоз ги исполнуваат стандардите на ЕУ чија цел е спречување на несоодветната употреба на антибиотици во сточарското производство.
„Бразил повеќе нема да биде овластен да извезува во Европската Унија животни наменети за производство на храна, ниту производи од животинско потекло наменети за човечка исхрана“, изјави портпаролка на Европската комисија за AFP.
Мерката ќе влијае врз производи како живинско и говедско месо, јајца и мед. Брисел не прецизира кога увозот би можел да продолжи.
Во мај Бразил беше вклучен на листата земји што не ги почитуваат правилата на ЕУ за употреба на антибиотици кај животните.
Ревизијата на бразилскиот сектор за живинарство и производство на мед треба да заврши во петок. Доколку резултатите бидат позитивни и земјите членки на ЕУ дадат согласност, извозот на бразилско живинско месо во Европската Унија би можел да биде обновен во рок од неколку недели. За обновување на увозот на говедско месо би можело да биде потребно повеќе време.
Европската комисија соопшти дека рокот за обновување на трговијата ќе зависи од брзината со која Бразил ќе може да докаже усогласеност со барањата на Европската Унија.
„Бразил е важен партнер на Европската Унија и тесно, конструктивно и позитивно соработуваме со бразилските власти за да обезбедиме усогласување со овие барања. Кога усогласеноста ќе биде докажана, извозот во Европската Унија ќе може да продолжи“, изјави портпаролката.
Бразилската влада не одговорила веднаш на барањето на AFP за коментар по објавувањето на одлуката, но уште во мај соопшти дека „брзо“ ќе преземе чекори за укинување на суспензијата.
Европската Унија сака да покаже решителност откако се соочи со силни критики од земјоделците и француските власти поради потпишувањето на договорот за слободна трговија со јужноамериканскиот блок Mercosur, кој го сочинуваат Аргентина, Бразил, Уругвај и Парагвај, во јануари 2026 година.
Бразил во 2025 година бил втор најголем снабдувач на Европската Унија со говедско месо, со извоз од повеќе од 92.000 тони во вредност од над 713 милиони евра, односно 825 милиони американски долари.
