Србија, откако утре ќе стапат во сила новите правила на Европската Унија во областа на употребата на антимикробни лекови, ќе може непречено да продолжи со извозот на живи животни и производи од животинско потекло на пазарот на ЕУ, објави Министерството за земјоделство, шумарство и водостопанство.
Како што е наведено, Србија во средината на јуни беше вклучена на листата земји што ги исполнуваат новите барања на Европската Унија во областа на употребата на антимикробни лекови, во согласност со Регулативата на ЕУ 2026/1189.
Вклучувањето на Србија на оваа листа потврдува дека домашниот систем за контрола на ветеринарните лекови, заштита на здравјето на животните и безбедност на храната е препознаен како усогласен со барањата на ЕУ.
Министерот за земјоделство, шумарство и водостопанство, Драган Гламочиќ, претходно изјави дека оваа одлука има директно значење за домашните производители и прехранбената индустрија, бидејќи обезбедува сигурност на извозот, го зачувува пристапот до еден од најважните надворешнотрговски пазари и дополнително ја зајакнува довербата во квалитетот и безбедноста на производите од Србија.
Тој наведе дека ова е потврда оти Србија доследно применува високи стандарди во областа на безбедноста на храната и дека домашните производители можат рамноправно да конкурираат на најпребирливите меѓународни пазари.
Од ресорното министерство истакнаа дека, во соработка со надлежните институции, ветеринарниот сектор и производителите, ќе продолжат да спроведуваат мерки што придонесуваат за одговорна употреба на лековите, зачувување на здравјето на животните и натамошно усогласување на домашните прописи со европските стандарди.
Според прописите на ЕУ, од 3 септември извозот на живи животни и одредени производи од животинско потекло ќе биде дозволен само за земјите што можат да докажат дека имаат сигурен систем за контрола на употребата на антимикробни лекови и дека ги исполнуваат пропишаните стандарди.
Целта на новите европски правила е сузбивање на антимикробната резистенција, односно појавата при која бактериите со текот на времето стануваат отпорни на антибиотици.
Овој проблем денес претставува еден од најголемите глобални предизвици во областа на јавното здравје, поради што ЕУ воведува построги правила за употребата на ветеринарни лекови во производството на храна.
