Анализи

ИГД: Запознајте ја генерацијата P

16 дек 2020

Опфаќајќи ги купувачите на возраст од 50 до 64 години, генерацијата P претставува клучна можност за глобалната трговија со прехранбени производи.

Извор: ИГД, www.igd.com

Дигитално умешни, опитни, подготвени да потрошат повеќе за квалитет... Една значајна група на купувачи е подготвена да го поттикне глобалниот сектор за прехранбени производи за 116 милијарди долари во наредните неколку години, создавајќи можност за 1,46 милијарда долари до 2022 година. Со удел од 30 отсто во вкупната потрошувачка на прехранбени производи и пијалаци на три клучни пазари, новото истражување на ИГД покажува дека таа е возрасната група во која треба да се инвестира во иднина. Надминувајќи ја генерацијата на милениумците, време е да се запознаете со новата генерацијата P, односно т.н. „perennial shoppers“ или трајни купувачи.

Опфаќајќи ги купувачите на возраст од 50 до 64 години, генерацијата P претставува клучна можност за глобалната трговија со прехранбени производи. Се очекува оваа група сè повеќе да расте и во големина и во значење во следните две години, особено во Велика Британија, Сингапур и во САД. На трите пазари истражувањето на ИГД идентификува можности за малопродажните трговци и доставувачите со кои ќе ги привлечат овие купувачи.

Истражувањето покажува колку се значајни овие купувачи за глобалниот пазар на прехранбени производи. Тие се ангажирана група купувачи, кои се достапни ако им се пристапи на вистинскиот начин. Конкуренцијата меѓу малопродажните трговци е веќе свирепа. Тие бараат нови начини да привлечат купувачи, а пандемијата на Ковид-19 го отежнува исцртувањето на иднината. Прецизниот фокус на вашите купувачи и знаењето како најдобро да допрете до нив ќе бидат клучни за успехот. Затоа, вистинско време е да се фокусираме на таа, честопати занемарена група, вели Сајмон Вејнрајт, директор за глобални анализи во ИГД.

Дигитално умешни, опитни, подготвени да потрошат повеќе за квалитет... Ангажирана група купувачи кои се достапни ако им се пристапи на вистинскиот начин.

Карактеристики на генерацијата P на интернационално ниво

(просечен процент, пресметан од анкетите за купувачите од Велика Британија, Сингапур и од САД)

  • Припадниците на оваа генерација стануваат сѐ поангажирани онлајн-купувачи на прехранбени производи. Повеќе од половина (56%) од генерацијата P понекогаш купуваат храна преку интернет, а третина (33%) велат дека во иднина ќе купуваат повеќе.
  • Имаат афинитет кон брендовите со кои пораснале, но исто така ги почитуваат и приватните трговски марки. Додека 67% од овие купувачи купуваат посебни брендови затоа што пораснале со нив, исто толку (68%) укажуваат дека се многу задоволни од квалитетот на приватните марки, а 58% им веруваат колку и на брендовите.
  • Генерацијата P повеќе ги вреднува погодноста и квалитетот во однос на цената. Значителни 75% од испитаниците на возраст од 50 до 64 години велат дека понекогаш се во искушение да трошат повеќе на производи со подобар квалитет, а 56% велат дека понекогаш трошат повеќе на производи што полесно се приготвуваат и готват.
  • Припадниците на оваа генерација сакаат да изберат производи со специфични етички или еколошки етикети, но имаат тенденција да им даваат приоритет на други фактори при одлуката за набавка. Гледајќи во иднината, повеќе од половината од генерацијата P (54%) укажуваат дека прашањата за животната средина ќе имаат поголемо значење за нив, но, сепак, 49% признаваат дека секогаш ќе им даваат приоритет на факторите квалитет и цена.

Генерацијата P не станува дигитална само поради дигитализацијата – усвојувањето на новите технологии за нејзините припадници е водено од докажаните практични придобивки, кои го надминуваат традиционалното купување во физичките продавници.

Регионални разлики – Велика Британија, Сингапур и САД

Иако т.н. трајни купувачи се обединети со фактот што се од иста возрасна група и се во слична фаза од животот, припадниците на генерацијата P од САД, Велика Британија и од Сингапур покажуваат одредени разлики, кои произлегуваат од различните социјални, економски, културни, па дури и географски услови и карактеристики на секоја земја.

Припадници на генерацијата P од Велика Британија:

  • Поголема е веројатноста да купат нови и различни прехранбени производи – 42% наспроти 34% од сингапурските купувачи и 36% од американските купувачи.
  • Поверојатно е да го приготват оброкот целосно од почеток – 69% наспроти 63% од купувачите во САД и 58% од купувачите во Сингапур.
  • Помала е веројатноста да купат приготвена храна или да јадат надвор – 15% наспроти 23% од американските купувачи и 25% од сингапурските купувачи.
  • Најверојатно ќе им дадат приоритет на специфичните етички и еколошки фактори при купувањето, како што се благосостојбата на животните (61% наспроти 50% во САД и 37% во Сингапур) и намалување на количеството амбалажа (53% наспроти 39% во САД и 26 % во Сингапур).
  • Поголема е веројатноста да ги проверат промоциите во продавницата и да купуваат импулсивно – 40% наспроти 31% во САД и 28% во Сингапур.
  • Помалку веројатно е дека го планираат купувањето – 39% наспроти 55% во САД и во Сингапур.

Припадници на генерацијата P од Сингапур:

  • Поголема е веројатноста да купуваат прехранбени производи преку интернет – 72% наспроти 55% од британските купувачи и 44% од американските купувачи.
  • Најзаинтересирани се за новата, релевантна технологија – 48% наспроти 39% од купувачите во Велика Британија и 46% од купувачите во САД.
  • Најангажирани се на социјалните медиуми – 99% наспроти 94% од британските купувачи и 86% од американските купувачи.
  • Корисници се на најширок спектар на платформи за социјални медиуми (вклучувајќи 90% употреба на „Ватсап“, за разлика од само 7% во САД, каде што платформата е непозната во голема мера).

Припадници на генерацијата P од САД:

  • Поверојатно е да купат познати производи отколку да пробаат нови – 49% наспроти 32% од купувачите во Велика Британија.
  • Најсигурни се во препознавањето на добрата вредност на – 79% наспроти 64% од сингапурските купувачи.
  • Поголема е веројатноста да прават големо неделно пазарување (75% наспроти 57% од сингапурските купувачи) и најмалку е веројатно да купуваат секојдневно (17% наспроти 32% од сингапурските купувачи).
  • Помала е веројатноста да купуваат прехранбени производи преку интернет – само 44% некогаш купиле нешто преку онлајн-каналот.

Коментирајќи ги можностите со оваа возрасна група, Вејнрајт истакнува: Трајните купувачи имаат вградено дигитално и онлајн-однесување кое ќе продолжат да го развиваат и понатаму во животот. Сепак, тоа е генерација што не станува дигитална само поради дигитализацијата – усвојувањето на новите технологии за нејзините припадници е водено од докажаните практични придобивки, кои го надминуваат традиционалното купување во физичките продавници.

Трајните купувачи покажуваат аспекти на вообичаеност и во начинот на купување и во афинитетот кон производите што им се познати. Сепак, тие исто така продолжуваат да ги развиваат и вкусот и изборот, покажувајќи постојана подготвеност да пробаат нови и различни производи. Притоа, една од главните карактеристики на оваа генерација е прагматичното размислување, односно балансот на квалитетот со вредноста на парите.



@InStore.mk
Крадењето авторски текстови е казниво со закон. Преземањето авторски содржини (текстови и фотографии) од оваа страница е дозволено само делумно и со ставање хиперлинк до содржината што се цитира. 


Слична содржина



ИГД: Глобални трендови во малопродажбата во 2021 година

20 јан 2021

Македонските производи во регионот

20 јан 2021

Еуромонитор: Топ-10 потрошувачки трендови за 2021 година (прв дел)

20 јан 2021

Ренак: Секој играч на македонскиот пазар ќе го почувствува доаѓањето на „Лидл“

20 јан 2021

Анализа на Себастијан Ренак: Што ќе значи влезот на „Лидл“ во С. Македонија?

20 јан 2021

Зелена економија: Освежување во модерното работење

20 јан 2021
Вчитува уште новости...