Маркетинг

Лука Козодер: Истражување онлајн, купување офлајн

04 сеп 2019

Според неодамнешното истражување на „Оберло“, дури 65 отсто од купувачите ги проверуваат цените на производите онлајн преку мобилните телефони додека се во физичката продавницa 

 Автор: Лука Козодер, „Њу стори медиа“

Дигиталниот маркетинг подразбира промоција на производите или услугите со користење дигитални комуникациски канали за одредена порака да стигне до целната публика. За голем број производи од нашето опкружување (облека, чевли, финансиски услуги) се користат предностите на дигиталниот маркетинг. Сепак, во тој широк спектар се чини дека FMCG-индустријата сè уште не го нашла своето место.

Каде е FMCG-индустријата денес?

Кондиторските производи, средствата за чистење, козметиката, (без)алкохолните пијалаци... сè уште во голема мера се продаваат офлајн, при што голема улога имаат видливоста на производот на полица, цената, атрактивниот дизајн и амбалажата. Маркетиншките експерти од другите сектори го развиваат моделот на примена на повеќекратни канали на продажба, анализирајќи го однесувањето на корисникот од првата посета на веб-локацијата до завршувањето на онлајн-купувањето. За разлика од нив, маркетиншките експерти за FMCG-индустријата сè уште каскаат, заглавени во традиционалните кампањи.

Стратегија, трансформација, планирање

Стратегијата, планирањето и изборот на соодветните техники што ги подразбира дигиталниот маркетинг се важни уште од почеток. FMCG-гигантите, како што се „Проктер & Гембл“, „Џонсон & Џонсон“, „Колгејт-Палмолајв“ и „Кимберлу Кларк“, се свесни за важноста на дигиталната трансформација, вложуваат сè повеќе во различни облици на дигитален маркетинг и бележат константен пораст на буџетот.

Што прават потрошувачите?

Дигиталните медиуми константно го менуваат своето опкружување. Денес потрошувачите секојдневно ги користат паметните телефони, таблетите и лаптопите, многу повеќе од традиционалните медиуми. Според неодамнешното истражување на „Оберло“, дури 65% од купувачите ги проверуваат цените на производите онлајн преку мобилните телефони додека се во физичката продавница. Тоа се поврзува и со т.н. тренд РОПО.

РОПО (ROPO – Research Online Purchase Offline)

Сè поголем е бројот на потрошувачи што најпрвин онлајн ги разгледуваат производите што ги интересираат, ги споредуваат цените и на крај одат во физичката продавница за да ги купат. Предностите на овој тренд може да се искористат само со разбирање на однесувањето на купувачот и онлајн и офлајн. Со поврзување на изворите на податоци од различни деловни области и нивна обработка маркетарите може да креираат персонализирани промоции и за онлајн и за физичките продавници.

Дигитални платформи

Дигиталните медиуми нудат различни платформи за промоција на брендовите и за комуникација со потрошувачите. Тука е вклучено и креирањето свест кај потрошувачот за лојалноста кон одреден бренд.

Создавање заедници

Наместо да се фокусираат на еднонасочна промоција на производите, маркетинг-експертите за FMCG создаваат содржина насочена кон корисникот. Тие нудат информативни содржини преку текстови, видеа, гифови, слики или преку создавање групи. За возврат добиваат заедница што е клучна за развој на лојалната база на потрошувачи.

Социјалните медиуми и дигиталното присуство

Социјалните медиуми суштински го менуваат начинот на кој создаваме рекламни содржини. „Фејсбук“, покрај „Јутјуб“ и „Инстаграм“, сè уште е недвосмислено една од најголемите социјални мрежи за дигитален маркетинг што користи напредни аналитички алатки. Сè поголем број потрошувачи ги користат компаниските профили и се распрашуваат, упатуваат жалби или пофалби за работата и за услугата. Добриот одговор за потрошувачите вреди како злато бидејќи тие сакаат некој што ќе ги уважи нивните барања и сугестии, но и потрошеното време. На тој начин се чувствуваат сигурно, а компанијата добива повратни информации од прва рака. Токму поради тоа, социјалните мрежи и онлајн-маркетингот се приоритет и главна алатка во маркетингот на светските компании.



@InStore.mk
Крадењето авторски текстови е казниво со закон. Преземањето авторски содржини (текстови и фотографии) од оваа страница е дозволено само делумно и со ставање хиперлинк до содржината што се цитира. 





Се вчитува следна вест...