Анализи

ИГД: Интернет-продажба во Азија – четири нови модели

18 ное 2016
Главните фактори што ќе го управуваат интернет-пазарот за храна се демографските промени, интернет и мобилната пенетрација, подобрувањето на логистичката инфраструктура и приклучувањето на повеќе играчи на прехранбената интернет-арена.
 
Автор: Ширли Жу, програмски директор на азискиот тим за истражување на ИГД
 
Азија е најголемиот регион за интернет-трговија во светот и е дом на многу интернет-гиганти, како што се „Алибаба", „Џингдонг мол" („Jingdong Mall", т.е. JD.com), „Флипкарт" и „Ракутен". И покрај динамичната природа на прехранбената индустрија, при преселувањето во сферата на интернетот, таа е малку побавна од некои други сектори, како што се модата или трговијата со книги. Сепак, денес, ова состојба во Азија се менува.
 
На континентот на изгрејсонцето, Кина е лидер во интернет-трговијата. Според прогнозите на ИГД, вредноста на интернет-пазарот за храна до 2020 година во земјата, ќе достигне речиси 180 милијарди долари. Според нашите истражувања, три од најдобрите десет интернет-пазари за храна се во Азија – Кина е на врвот, Јапонија е трета, а Јужна Кореја – шеста, со што се покажува силата на азискиот пазар.
 
Управувачи на интернет-трговијата во Азија
 
Постојат четири главни фактори што ќе го насочуваат и ќе го управуваат интернет-пазарот за храна. Тоа се: демографските промени, вклучувајќи ги урбанизација, подемот на средната класа во Кина, Индија и во Индонезија, како и созревањето на милениумците; интернет и мобилната пенетрација; подобрувањето на логистичката инфраструктура и приклучувањето на повеќе играчи на прехранбената интернет-арена.
 
Како што регионот забрзано се приближува до пресвртната точка, воочивме четири модели што ќе ѝ помогнат на прехранбената интернет-трговија.
 
Четири нови модели на интернет-продавници
 
1.„Брикс енд кликс"
 
Терминот „брикс енд кликс" (bricks аnd clicks) е жаргон за бизнис-модел, преку кој трговецот го интегрира офлајн (bricks) и онлајн (clicks) присуството. Понекогаш, во моделот е додаден и третиот елемент – „флипс" (flips), односно печатените каталози.

Трговците од форматот „брикс енд кликс" го градат своето интернет-присуство. Конечно, секој трговец има сопствен дигитален излог. Овие трговци имаат огромна мрежа и база на купувачи и податоци, кои може да ги користат за земање на нарачките или за испорака. Освен тоа, имаат и добри можности за категори-менаџмент.

На пример, „Алфамарт" во Индонезија трансформираше 12.000 продавници и ги претвори во места од каде потрошувачите може да ги подигнат нарачките од интернет.
Сепак, овие малопродажни трговци се нови за интернет-светот и честопати им недостига разбирањето на интернет-купувачите, искуството во дигиталниот маркетинг, а треба да работат и на поединечните нарачки. Тоа е можност и за производителите да соработуваат со нив.
 
За да иницираат и да поддржат интернет-активности кај трговците, брендовите би можеле да создаваат повеќе дигитални содржини. Добар пример за тоа е кампањата на „Унилевер" во Индонезија за време на Рамазан. „Унилевер" лансираше нова интернет-страница, која овозможи инспирацијата од големиот муслимански празник да биде пренесена на интернет-промоциите на малопродажните трговци. На промоцијата ѝ се приклучија најдобрите дваe индонезиски трговски компании – „Алфамарт" и „Индомарет".
2.Диверзифицирани интернет-трговци
 
Диверзифицираните трговци (трговци со тесна понуда) честопати имаат добра технолошка основа и се одлични во маркетингот на интернет и во таргетирањето. За да ги исполнат посебните потреби на потрошувачите, тие се обидуваат да изградат авторитет во одредени категории, со што би ја зголемиле лојалноста и би го избегнале ценовниот натпревар со конкурентите.
 
Од друга страна, интернет-пазарот за храна се развива со голем интензитет  во дигиталната сфера, што врши притисок врз трговците на мало. Некои диверзифицирани трговци немаат силни постоечки односи со доставувачите и нивниот асортиман од производи понекогаш е ограничен.
 
Производителите може да дизајнираат ексклузивни производи за овие трговци, со што ќе им помогнат да изградат авторитет во категоријата. Како успешен пример може да се наведе пиварницата „Архипелаго брувери", која го снабдува ексклузивно „Редмарт" во Сингапур со пиво.
3.Компании за е-трговија
 
Компаниите за е-трговија се поважни во Азија отколку каде било на друго место во светот. Тоа значи дека и производителите и малопродажните трговци се стремат да формираат партнерства со нив. Компаниите, како што се „Алибаба" и „Џингдонг мол", привлекуваат голем дел од сообраќајот, имаат големи бази на купувачи, стандардизиран начин на плаќање, системи за испорака, како и силна способност за анализа на бројните податоци.
 
И покрај високите трошоци на доставувачите за да ги постават и да работат на просторот на овие платформи за е-трговија, тие се задолжителен канал за продажба на интернет во Азија. FMCG-производителите може да помогнат за зголемување на понудата на компаниите за е-трговија, а како резултат на тоа, ќе се зголеми фреквенцијата на потрошувачи и големината на потрошувачката кошница.
 

Добар пример за соработка меѓу производителите и компаниите за е-трговија е брендот Oreo Colorfilled на „Монделез", кој беше развиен исклучиво за корисниците на Tmall.com. Купувачите може да изберат образец, да го пополнат со бои, да постават заднина со Орео и да додадат персонализирана порака на пакувањето. Персонализираните производи им помогнаа на многу брендови да се истакнат од другите.

 
4.Аутсорсинг-доставувачи
 
Испораката и консиерж-услугите се во процут откако купувачите сè повеќе се под притисок на времето. Ниските трошоци за работна сила во Азија, како и густата населеност, го прават аутсорсингот, како модел на испорака, економски исплатлив. Некои од малопродажните трговци, наместо да ги градат сопствените дистрибутивни системи од нула, соработуваат со давателите на тие услуги. На пример, логистичката компанија „Нинџа Ван" за испорака ја користи апликацијата Uber и соработува со бројни ресторани и продавници во Сингапур.
 
Искористувањето на постојните ресурси е честа појава во дигиталната економија, што прехранбената индустрија треба да го достигне.
 
Совети за продажба на интернет во Азија
 
На кој начин производителите од прехранбената индустрија може да профитираат од можностите за користење на овие интернет-модели?
Производ:
  • Создавајте производи по мерка на потрошувачот, во комбинација со различни интернет-модели;
  • Понудете ексклузивни и персонализирани производи на избрани трговци.
Мерчендајзинг:
  • Оптимизирајте го дигитално присуство;
  • Подгответе специјални објави на интернет-страниците на трговците на мало и таргетирано испраќајте мејлови.
Цени и промоции:
  • Попустите не се единственото решение – бидете инвентивни;
  • Создадете дигитална содржина и кампањи и поканете ги трговците да партиципираат.
Канали:
  • Гледајте на интернет и на традиционалните канали холистички, како на една целина;
  • Експериментирајте со аутсорсинг-компании.
 
Производителите од прехранбената индустрија, кои сакаат да се „вгнездат" во Азија, имаат можност да го направат тоа преку е-трговијата. Ако досега не го направиле тоа, сега е моментот! Изборот на вистинските партнери и нивното снабдување со вистинските производи е чекор поблиску до освојувањето на пазарот.
 


@InStore.mk
Крадењето авторски текстови е казниво со закон. Преземањето авторски содржини (текстови и фотографии) од оваа страница е дозволено само делумно и со ставање хиперлинк до содржината што се цитира. 





Се вчитува следна вест...