Talk IN Business: Козметика и средства за лична хигиена

Рефлектирање на трендовите од светот во Македонија

• Пласирањето и позиционирањето на органската козметика во Македонија е отежнато поради тоа што кај потрошувачите сè уште не е развиена свеста за придобивките од нејзиното користење. Проблемот кај компаниите е што рокот на овие производи е многу краток, а цената висока за македонскиот стандард;
• Едукација на потрошувачите за овој тип козметика е од големо значење, а производителите, односно дистрибутерите, заедно со маркетите можат да организираа едукации, во вид на саеми, манифестации и сл.;
• Тренд во Македонија се козметичките производи против стареење (anti age) за кои македонските потрошувачи се добро запознаени;  
• Голем предизвик за компаниите се декларациите и пишувањето на сите состојки со кирилично писмо, особено кога станува збор за помали производи каде што реално нема простор за големи декларации. Можеби е потребна и помош на консултанти, кои на местото на продажбата ќе ги појаснуваат придобивките на производите, но законските обврски наложуваат печатени декларации;
• Трендот на ХАЛАЛ-козметиката во светот зема сè поголем замав, а во Македонија има потенцијал за тоа, но допрва треба да се развива. 

Марија Давитковска, бренд-менаџер и асистент за логистика, „АВТ-интернатионал"

За нас, како дистрибутери, оваа конференција има големо значење, пред сè, поради можноста за добивање позитивни повратни информации за проширување на нашите видици за понатамошниот развој и за дистрибуција на козметиката на македонскиот пазар. Компанијата „АВТ-интернатионал" е една од водечките за дистрибуција во Македонија и имаме одлична соработка со целиот малопродажен пазар, како претпочитан партнер со 20-годишно искуство во дистрибуцијата на многу важни категории, меѓу кои и козметиката. Информациите што ги добивме од презентациите ќе бидат повеќе од корисни.

Највпечатлива беше презентацијата на Мери Каталиниќ, која беше со интересни податоци што можат да се искористат во понатамошното наше проширување и истражување на пазарот на категоријата.

Елена Јаков, одговорна за детергенти, хартија и козметика, „Рамстор"

Интерактивните средби се одлична можност за размена на искуства во однос на секојдневните проблеми и предизвици со кои се среќаваме, како и за потенцијални решенија. Нашата заедничка цел е да се доближиме до македонскиот потрошувач, бидејќи сегментацијата на пазарот и дефинирањето на вистинските целни групи е голем предизвик на денешниот успешен продавач.

Презентациите на истражувањата од македонскиот и од странските пазари за одделни козметички категории, само ни ја потврдуваат потребата од постоење на официјални истражувања и податоци за современите навики на потрошувачот.

Благица Ангелковиќ, менаџер за истражување, „Ипсос пулс"

Конференцијата Talk IN Business е убава идеја за воспоставување спонтана комуникација меѓу учесниците, каде што можат да се слушнат интересни и корисни информации, да се разменат идеи и контакти.  

Сметам дека на оваа конференција недостигаа претставници од секторот на производство, кој е клучен дел од целосната слика на  FMCG-секторот. Само со соработка меѓу трговците и дистрибутерите, производителите и истражувачките агенции, односно маркетинг-агенциите, може да зборуваме за градење план и стратегија во менаџирањето со брендовите и за успешно одржување на пазарот, кој секојдневно се развива и нуди сè поголема конкуренција.

Љундрим Ологу, супервизор на продажба, „Харбини козметика"

Конференцијата Talk IN Busines и средбата Б2Б на тема козметика е една од ретките конференции од тој тип, која се грижи за интерактивноста и за соработката меѓу конкурентите, постојните и идните потенцијални соработници во козметичката индустрија. Претставувајќи ја „Харбини козметика", задоволен сум од учеството и од организацијата, со надеж за постојано подобрување и за поголемо внимание кон декоративната козметика, како водечки дел од индустријата, како и внесување на повеќе брендови (шампони, медицинско-козметички средства и сл.).

Покрај сите други добро организирани делови, последниот дел од конференцијата, односно групните дискусии на тркалезните маси, ми оставија впечаток со тоа како интерактивноста може да се издигне на повисоко ниво, како помош и поддршка за соработка меѓу учесниците во индустријата.

Марија Арсовска, бренд-менаџер, „Тим поинт"

Ги поддржувам интерактивните средби и сметам дека тие секогаш имаат голем потенцијал, се разбира, во зависност од потенцијалот на учесниците во дискусијата.

Истражувањата и анализите на пазарот се основните алатки во секој сериозен пристап во светот на бизнисот.

На конференцијата Talk IN Busines, најмногу ми се допаднаа „работните маси", односно интерактивната дискусија, на која се зборуваше за многу конкретни и практични проблеми што сите нèзасегаат, а ретко имаме можност да ги споделиме искуствата.